Lancaster Group «Қазақ тілі» қоғамына 200 млн теңге бөлді
Lancaster Group акционерлері – Берік Қаниев, Гаухар Қаппарова және Юрий Пак Qazaq Tili Endowment қорына 200 млн теңге бөлу туралы шешім қабылдады. Бұл – қазақ тілін қолдау қорына бағытталған ең қомақты үлестің бірі.
«Қазақ тілі» қоғамының эндаумент қоры 2023 жылы мемлекеттік тілді дамыту мен қолдау мақсатында жүйелі және тұрақты жұмысқа қажет қаржылық негіз қалыптастыру үшін құрылған. Бірінші болып бұл бастаманы Қазақстан Президенті Қасым-Жомарт Тоқаев қолдап, 7 млн теңге көлемінде жарна аударған еді. Мемлекет басшысының бұл бастамасын белгілі қазақстандық кәсіпкерлер мен қазақ тілінің жанашырлары жалғастырды.
Фото: «Қазақ тілі» қоғамы
Эндаумент қордың басты мақсаты – еліміздегі мемлекеттік тілді дамыту және қолдау бағытында жұмыс істейтін ең ірі қоғамдық ұйым – «Қазақ тілі» қоғамының тұрақты әрі ұзақмерзімді дамуын қамтамасыз ету. Эндаумент қорының ерекшелігі бар, онда жиналған қаражаттың өзі жұмсалмайды. Тек қордың инвестициялық қызметінен түскен табысы ғана «Қазақ тілі» қоғамының жарғылық міндеттерін жүзеге асыруға жұмсалады. Qazaq Tili Endowment қоры тәуелсіз қамқоршылар кеңесіне бағынады. Қамқоршылар кеңесі құрамында беделді қоғам қайраткерлері, кәсіпкерлер мен ірі демеушілер бар.
Қордық жария есебі мен мен демеушілер тізімі www.til.kz сайтында жарияланады. Lancaster Group аударатын қаржыға дейін қор есепшотында 503 669 299 теңге болды. «Қазақ тілі» қоғамының президенті Рауан Кенжеханұлының айтуынша, 2024 жылы Qazaq Tili Endowment қорының үстеме табысы 75 млн теңгені құрады. Осы қаражат есебінен өткен жылы 40-тан астам жоба мен іс-шара жүзеге асырылды. Олардың қатарында Oxford Qazaq Dictionary жобасы, Disney, Pixar және Sony студиялары фильмдерінің дубляж жұмысын насихаттау, кеңінен тарату және әдістемелік құралдар әзірлеу, балаларға арналған, іскерлік және ғылыми-танымдық кітаптарды аудару және басып шығару, өзге де маңызды бастамалар бар.
Lancaster Group – Қазақстандағы аса ірі көпсалалы халықаралық холдингтік компаниялардың бірі. Компания әртүрлі салаларға инвестиция салады, халықаралық жетекші операторлармен бірлескен кәсіпорындар құрады және өнеркәсіптік инфрақұрылым, мұнай-газ секторы, жер қойнауын пайдалану, тау-кен өндірісі, фармацевтика, логистика, басқару және білім беру салаларында жұмыс істейді.