Вашингтонда Oxford Qazaq Dictionary сөздігі таныстырылды

Шараға Джорджтаун университетінің профессоры, CERES орталығының директоры, тарихшы Майкл Дэвид-Фокс, Мэриленд университетінің профессоры, қазақ тілінде «Аштық жайлаған дала. Ашаршылық, озбырлық және Кеңестік Қазақстанды орнату» деген атпен шыққан танымал зерттеудің авторы Сара Кэмерон, Freedom Holding Corp. Директорлар кеңесінің мүшесі Қайрат Келімбетов, Халықаралық «Қазақ тілі» қоғамының президенті Рауан Кенжеханұлы, сондай-ақ университет ғалымдары, оқытушылар мен  студенттер қатысты.

Таныстырылымға жиналған мамандар бұл сөздіктің қазақ тілін, мәдениетін, тарихы мен әдебиетін зерттеушілер үшін аса маңызды жаңалық екендігін айтты. Шараға қатысқан ғаламдарға, университет кітапханасына сөздіктер табысталды. Бұған дейін, 2020 жылы қазақ тілі, мәдениеті мен әдебиетін ағылшынтілді ортаға кеңінен таныстыру, насихаттау үшін Дж. Вашингтон университеті қабырғасында Абай орталығы құрылған болатын.

Oxford Qazaq Dictionary сөздігін әзірлеуде дүние жүзіне танымал Oxford университі баспасының сөздік құрастыру әдістемесі мен технологиясы негізге алынды. Сөздік құрастыру жұмысы 4 жыл үздіксіз жүріп, оған қазақ және ағылшын тілінің лексикасына маманданған 50-ден аса тәжірибелі маман атсалысты. Екі тілді сөздік 60 мыңнан аса сөзді қамтиды. Басылым 1300 беттен тұрады. Қазақша-ағылшынша және ағылшынша-қазақша Oxford сөздігінің тұңғыш басылымын Қазақстан президенті Қасым-Жомарт Тоқаевтың тапсырмасымен Халықаралық «Қазақ тілі» қоғамы дайындады.

Сөздік негізінде қазақ тілі Oxford Global Languages платформасына қосылды. Oxford Qazaq Dictionary қазақ тілін әлемдегі ең танымал әрі ең беделді сөздіктер желісімен байланыстырып, ғаламдық лингвистикалық ортаға қосылуға мүмкіндік берді.

Сөздік Freedom Holding Corp. қолдауымен 10 000 дана таралыммен басылды.

Freedom Holding Corp. – еншіліс Freedom компаниясы арқылы қаржы қызметтері, брокерлік операциялар, инвестиция бойынша кеңес беру, бағалы қағаздар саудасы, инвестициялық-банктік және андеррайтингтік қызметтерді жүзеге асыратын холдинг. Холдинг негізін қалаушы – Тимур Турлов. Қазақстандық кәсіпкер, қаржыгер.

Сөздік Қазақстандағы оқу орындарының кітапханаларына тегін таратылды. Жергілікті кітап дүкендерінде сатылымға шықты.

Анықтама:

«Халықаралық «Қазақ тілі» қоғамы» 1989 жылы 22 қыркүйекте құрылған. Биыл Қоғамның құрылғанына 35 жыл толды. Қазақ тілін дамытуға ынталы тіл жанашырларын біріктіретін Қазақстандағы ең ірі қоғамдық ұйым. Қазақ тіліндегі мазмұн қорын арттыру, білім беру жүйесіне әдістемелік қолдау көрсету, тілді дамытуда IT-шешімдерді ұтымды қолдану бағыттарындағы жобалар мен іс-шараларды жүзеге асырады.

Georgetown University (Джорджтаун университеті) – Вашингтон қаласында орналасқан саяси ғылымдар және дипломатия саласындағы әлемдегі жетекші білім орны. Джорджтаун университеті халықаралық қатынастар, құқық және бизнес саласындағы бағдарламаларымен танымал әрі жоғары академиялық стандарттарға ие.